HÆ! AFSAKIÐ BIÐINA! GLEÐILEGT ÁR! NÚ ERU ÞAÐ ÍSLENSKU LÖG ÁRSINS! BARA GAMAN!

Örn skokkar, Valdimar gengur rösklega. Báðir eru þeir vel stemmdir því þeir eru að hlusta á hlaupalögin sín.

Valdimar og Örn horfðu mikið á sjónvarp þegar þeir voru börn og táningar á 10. áratugnum og tala hér um þá sjónvarpsþætti sem þeim þóttu skemmtilegastir á þeim tíma.

Valdi og Össi eru báðir með nef sem þeir nota til að finna lykt af hinum ýmsu hlutum. Nú ræða þeir um sínar uppáhalds lyktir.

Á Íslandi eru alls konar byggingar sem Valdi og Örn annað hvort fíla eða fíla ekki. Nú tala þeir um byggingarnar sem þeir fíla.

Hæ. Listamenn hér. Súpur. Þær eru góðar. Þær eru margar. Þær eru umræðuefni þáttarins þessa vikuna.

Svavar Pétur var einstakur maður. Listamenn telja sig heppna að hafa fengið að kynnast honum. Þessi þáttur er tileinkaður honum.

Valdi og Össi ræða um grænmeti. Grænmeti er voðalega hollt.

HÆ! Listamenn tala hér um lög sem voru samin sérstaklega fyrir bíómyndir. Það er nú bara þannig.

LISTAMENN ERU MÆTTIR AFTUR! Í þessum endurkomuþætti tala Valdi og Össi um allt það skemmtilega sem þeir gerðu í sumar.

ÞÁTTUR NÚMER 50! Þeir eru mættir aftur listadrengirnir og ætla nú að ræða um íslenskar hljómplötur úr 9unni. Gjössovel.

Covid, illmenni lífs okkar allra síðustu 2 ára, olli því að Listamenn þurftu að taka sér smá pásu. Er þá ekki viðeigandi að ræða um illmenni kvikmyndasögunnar? Það höldum við.

Valdi og Össi hafa spilað á rosalega mörgum tónleikum. Góðum og slæmum. Hvaða tónleikar ætli standi upp úr hjá þeim?

Bakkelsi og kruðerí er svakalega gott með góðum kaffibolla. Össi og Valdi kíkja aðeins í bakaríið.

Valdimar og Örn eiga báðir snjallsíma sem þeir nota ansi mikið, þar af leiðandi nota þeir einnig ansi mikið af snjallsímaforritum. Ansi snjallir strákar.

Drykkir eru afskaplega góðir. Þeir geta verið sætir, súrir, sterkir, beiskir, bragðlausir og allt þar á milli. Sérstakur gestur er geðþekki öðlingurinn og listaunnandinn Snæbjörn Ragnarsson.

Þar sem undankeppnin fyrir Eurovision er handan við hornið ákváðu Listamenn að taka fyrir bestu íslensku lög sem komust ekki í keppnina stóru.

Valdiman og Örninn fljúgandi eru mættir til að bjarga deginum! Ofurhetjur!

Listamenn eru nammigrísir miklir. Nú velja þeir topp 10 „nömmin” sín í bland í poka.

Fyrir þá sem ekki vita, þá hafa Valdi og Össi sko djammað. Á alls konar stöðum. Skemmtistöðum.

Að geta keypt sér óhollan mat án þess að þurfa að stíga út úr bílnum sínum er lúxus sem Valdi og Össi gjörsamlega elska.

Gleðilegt nýtt ár! Valdimar og Örn eru loksins komnir aftur eftir jólafrí og nú er það sko nýársbomba: Ávextir!

Valdi og Össi tala um uppáhalds jólahefðirnar sínar. Gleðileg jól kæru listaunnendur. Við sjáumst svo alveg svakalega hress á nýju ári.

Við Íslendingar eigum mjög marga jólahittara sem voru upprunalega bara alls ekki jólalög. Valdi og Össi skoða þau aðeins á meðan þeir reyna að jafna sig á þynnkunni eftir gleðskap gærkvöldsins.

Okkar dyggasti hlustandi hefur oftar en einu sinni og oftar en tvisvar beðið okkur um að taka fyrir borðspil. Nú getur hann hætt að spyrja.

Össi og Valdi eru nú meiru kallarnir. Jafnvel bara alveg kexruglaðir! Kex, gjöriði svo vel!

Í þetta skiptið fékk Valdimar að ráða hvaða listi yrði tekinn fyrir. Líklega leiðinlegasti þáttur sem við höfum gert (samt alveg skemmtilegur sko).

Við leyfðum facebook grúppunni okkar að velja listaefni þáttarins og það kom aldeilis í bakið á okkur. Takk Baldur.

Morgunstund gefur korn í munn-d. Valdi og Össi fara á dýptina hvað morgunkorn varðar, alveg niður í botn skálarinnar.

Valdimar og Örn raða hér sínum uppáhalds spendýrum á topp 10 lista. Valdimar og Örn eru fullorðnir menn. Og spendýr.

Valdi og Össi draga fram krumpugallann, setja svitaband á ennið og bíta í neðri vör. Það er áttan.

Össi og Valdi tala um snakk. Alls konar snakk. Snakk er gott. #takksnakk

Valdimar og Örn eru staddir á Stöðvarfirði í upptökusessjóni og fóru í ríkið á Fáskrúðsfirði og keyptu sér besta bjórinn sem var í boði þar. Trommuleikarinn Þorvaldur Halldórsson er sérstakur gestur.

Þó orðaforðinn hjá Valdimari og Erni sé ekki ríkur þá hafa þeir nú samt gaman af góðum íslenskum orðum.

Jæja, nú eru það tölvuleikir. Þetta verður áhugavert.

Valdi og Össi elska góð gítarsóló. Það er vindur í hári og miklar munngeiflur í þessum þætti því nú taka strákarnir fyrir topp 10 gítarsóló.

Á Íslandi eru margar ofboðslega fínar sundlaugar. Valdi og Össi reyna í þessum þætti að koma því til skila hvaða sundlaugar þeim finnst vera bestar. Mikill guslugangur í þessum þætti.

Nú ætla Valdi og Össi að tækla tónlistina í núllunni. Erfitt verkefni.

Valdimar og Örn eru mættir aftur eldhressir eftir sumarfrí og í þetta skiptið ætla þeir að vera með læti og ræða um meðlæti.

Góð lög geta gert góðar bíómyndir ennþá betri. Hér eru okkar uppáhalds lög í bíómyndum.

Valdimar og Erni þykir voða gott að fá sér kokteila. Sumarfílingur og kokteilar, hvað er betra?

Hver elskar ekki frí? Valdimar og Örn ræða hér um sína uppáhalds frídaga.

Valdimar og Örn elska krydd. Krydd er líka best. Topp 10 krydd gjöriði svo vel!

Listamenn stunda það mikið að spila coverlög. Nú velja þeir coverútgáfur af lögum sem þeim finnst vera betri en hjá upprunalegum flytjendum lagsins.

Valdimar og Örn eru matgæðingar miklir. Nú taka þeir fyrir hornstein í íslenskri matarmenningu, skyndibita.

Listamenn eru staddir á hótelherbergi í Neskaupstað eftir vel heppnað gigg á Beituskúrnum. Með bjór og smá viskí í glösum ræða þeir um tónlistarfólk sem dó of ungt. Þessi þáttur er svolítið dökkur, biðjumst velvirðingar á því.

Listamenn rifja upp sín vandræðalegustu augnablik. Mjög vandró þáttur.

Valdimar og Örn hafa haldið tónleika á ýmsum stöðum víðs vegar um landið. Nú ætla þeir að tala um sína uppáhalds tónleikastaði.

Valdimar og Örn undirbúa sig fyrir heimsendi, sem er vonandi alls ekki í nánd.

Strákarnir eru í miklum gír þennan laugardaginn og tala um þau lög sem ná að peppa þá mest.

Í þessum þætti ræða Valdi og Össi um boðorðin 10 og eiga eflaust á endanum eftir að fara rakleiðis til helvítis.

Á ferðalögum sínum um landið hafa Valdimar og Örn fengið sér ansi marga kaffibolla og oftar en ekki fá þeir sér súkkulaðistykki með. Mmm, súkkulaði.

Þeir vita ekki hvernig þeir fóru að því, en einhvern veginn tókst Valda og Össa að tala um sín uppáhalds heimilistæki í klukkutíma og korter. Góða skemmtun!

Valdimar og Örn vita augljóslega ekkert um bíla en þeim finnst þeir skemmtilegir og nú ræða þeir um sína uppáhalds bíla.

Valdi og Össi elska Bítlana og í þessum þætti ræða þeir félagar um sín uppáhalds lög frá því stórkostlega bandi.

Sósur eru góðar. Sósur eru margar. Sósur eru í uppáhaldi hjá Valdimari og Erni og í þessum þætti ætla þeir að tala um sínar uppáhalds sósur.

Valdimar og Örn ræða topp 10 löndin sem þeir hafa heimsótt og segja sögur af hinum ýmsu utanlandsferðum sem þeir hafa farið í.

Valdimar og Örn ætla í þessum þætti að ræða um sínar uppáhalds íþróttagreinar. Þess ber að geta að hvorugur þeirra er mikill sérfræðingur á því sviði.

Í þætti númer 2 þræða Valdimar og Örn Stór-Reykjavíkursvæðið og leiða hvorn annan í gegnum uppáhalds göturnar sínar.

Í fyrsta þætti Listamanna ræða Valdimar og Örn um sínar uppáhalds bíómyndir frá öðrum áratug 21. aldar.

Listamenn er nýtt hlaðvarp frá tónlistarmönnunum Valdimari Guðmundssyni og Erni Eldjárn í samstarfi við Hljóðkirkjuna. Frá því að Valdimar var ungur spekúlant hefur honum þótt ofboðslega gaman að búa til lista. Listarnir gátu verið af ýmsum toga, meðal annars uppáhalds plötur frá ákveðinni hljómsveit, verstu illmenni bíómyndasögunnar eða jafnvel bara bestu tómatsósutegundirnar. Örn og Valdimar hafa ferðast mikið saman um landið í gegnum tíðina og hafa þeir því eytt löngum stundum með hvor öðrum í bíl. Á þessum ferðalögum hefur Valdimari tekist að smita Örn af þessu áhugamáli sínu og varð þetta að þeirra uppáhalds leik þegar bílferðirnar urðu langar. Nú ætla þeir félagar að gera þennan leik að hlaðvarpi og fyrir hvern þátt munu þeir búa til sitt hvorn topp 10 listann yfir alls konar hluti, hugtök og fyrirbæri og ræða um þá sín á milli.